|

BAZA LIGJORE

Komisioneri ushtron kompetencat e tij për garantimin e së drejtës për mbrojtjen e të dhënave personale, në përputhje me Ligjin nr. 124/2024 “Për mbrojtjen e të dhënave personale” dhe aktet nënligjore të nxjerra në zbatim të tij. Në ushtrimin e kompetencave të tij, Komisioneri ushtron funksione mbikëqyrëse, hetimore, korrigjuese, këshilluese dhe ndërgjegjësuese për garantimin e së drejtës për mbrojtjen e të dhënave personale. Monitorimi i përpunimit të të dhënave personale është i vazhdueshëm, gjithëpërfshirës, efikas dhe i planifikuar. Ai realizohet nëpërmjet kompetencave që Komisionerit i janë dhënë me ligj. Kompetencat e Komisionerit në fushën e mbrojtjes së të dhënave personale përcaktohen në nenet 82 dhe 83 të Ligjit nr. 124/2024 “Për mbrojtjen e të dhënave personale”, të cilat parashikojnë përkatësisht detyrat dhe kompetencat për zbatimin e tyre, si dhe kompetencat ndihmëse të Komisionerit.

Sipas Ligjit nr. 124/2024 “Për mbrojtjen e të dhënave personale”, Komisioneri është përgjegjës për:

• monitorimin dhe mbikëqyrjen e zbatimit të legjislacionit për mbrojtjen e të dhënave personale dhe hartimin e raportit vjetor për këtë fushë;
• ndërgjegjësimin e publikut, kontrolluesve dhe përpunuesve mbi rregullat, rreziqet, masat mbrojtëse dhe të drejtat që lidhen me përpunimin e të dhënave personale;
• kryerjen e hetimeve për përputhshmërinë e përpunimit të të dhënave personale me ligjin, kryesisht ose mbi bazë ankese;
• garantimin e ushtrimit të të drejtave të subjekteve të të dhënave dhe informimin e tyre për to;
• shqyrtimin e ankesave të paraqitura nga subjektet e të dhënave, për shkelje të legjislacionit për mbrojtjen e të dhënave personale;
• dhënien e opinioneve dhe rekomandimeve për masat ligjore e administrative që lidhen me garantimin e së drejtës së individëve për mbrojtje të të dhënave personale;
• monitorimin e zhvillimeve që ndikojnë në mbrojtjen e të dhënave personale dhe publikimin e rekomandimeve për zbatimin e ligjit;
• miratimin dhe publikimin e udhëzimeve dhe udhëzuesve për përpunimin e të dhënave personale dhe detyrimet që burojnë nga ligji;
• dhënien e autorizimit dhe miratimin e mekanizmave të mbrojtjes së të dhënave, përfshirë klauzolat standarde dhe rregullat e detyrueshme të shoqërive tregtare;
• këshillimin e kontrolluesve për konsultimin paraprak, vlerësimin e ndikimit dhe përputhshmërinë me kërkesat e ligjit;
• nxitjen dhe miratimin e kodeve të sjelljes, si dhe akreditimin e organeve monitoruese për zbatimin e tyre;
• nxitjen e certifikimit, vulave dhe markave të mbrojtjes së të dhënave, si dhe akreditimin e organizmave certifikues;
• mbikëqyrjen dhe autorizimin e transferimeve ndërkombëtare të të dhënave personale;
• rishikimin e përgjigjeve të autoriteteve kompetente lidhur me kërkesat për akses, korrigjim ose fshirje të të dhënave;
• vendosjen e sanksioneve administrative dhe mbikëqyrjen e zbatimit të tyre;
• bashkëpunimin ndërkombëtar me autoritete dhe organizata për zbatimin efektiv të legjislacionit për mbrojtjen e të dhënave personale;
• përfaqësimin e Zyrës së Komisionerit në aktivitete kombëtare dhe ndërkombëtare, si dhe mbajtjen e regjistrit të shkeljeve dhe masave të marra.

Për përmbushjen e detyrave të tij, Komisioneri ushtron kompetenca ndihmëse, të ndara në kompetenca hetimore dhe korrigjuese.

Kompetencat hetimore përfshijnë:

• njoftimin e kontrolluesit dhe përpunuesit për shkelje të pretenduara të ligjit, duke kërkuar edhe qëndrimin e tyre lidhur me këto pretendime;
• kërkimin nga kontrolluesit dhe përpunuesit të çdo informacioni, dokumentacioni apo të dhëne të nevojshme për ushtrimin e detyrave të Komisionerit;
• aksesin në mjediset, pajisjet dhe mjetet e përpunimit të të dhënave të kontrolluesve dhe përpunuesve;
• kryerjen e hetimeve administrative, në formën e auditimit për mbrojtjen e të dhënave personale;
• rishikimin e certifikimeve të lëshuara nga organizmat certifikues, sipas kërkesave të ligjit;
• rishikimin e ligjshmërisë së përpunimit të të dhënave personale në rastet e kufizimit të të drejtave të subjekteve të të dhënave.

Kompetencat korrigjuese përfshijnë:

• dhënien e paralajmërimeve dhe rekomandimeve ndaj kontrolluesve dhe përpunuesve për garantimin e përputhshmërisë me ligjin;
• dhënien e vërejtjeve për shkeljet e konstatuara të dispozitave ligjore;
• urdhërimin e kontrolluesve dhe përpunuesve për respektimin e të drejtave të subjekteve të të dhënave;
• urdhërimin e kryerjes së veprimeve të përpunimit në përputhje me ligjin dhe brenda afateve të përcaktuara;
• urdhërimin e njoftimit të subjekteve të të dhënave për cenimet e të dhënave personale;
• vendosjen e kufizimeve të përkohshme ose përfundimtare, përfshirë ndalimin e përpunimit të të dhënave personale;
• urdhërimin e korrigjimit, fshirjes ose çregjistrimit të të dhënave personale, si dhe kufizimin e përpunimit të tyre, sipas ligjit;
• shfuqizimin e certifikimeve ose urdhërimin e pezullimit të lëshimit të tyre, kur nuk plotësohen kërkesat ligjore;
• urdhërimin e pezullimit të transferimit të të dhënave personale drejt një vendi të tretë ose organizate ndërkombëtare;
• vendosjen e sanksioneve administrative, të cilat mund t’i shtohen ose të zëvendësojnë masat e lartpërmendura, në varësi të rrethanave të çdo rasti individual.

Gjatë ushtrimit të kompetencave hetimore dhe zhvillimit të procedurës administrative, Komisioneri zbaton dispozitat e Kodit të Procedurave Administrative të Republikës së Shqipërisë.

HAPAT PËR SHQYRTIMIN E ANKESAVE

Procedura për paraqitjen dhe shqyrtimin e ankesave në fushën e mbrojtjes së të dhënave personale rregullohet nga Ligji nr. 124/2024 “Për mbrojtjen e të dhënave personale”. Komisioneri shqyrton ankesat e subjekteve të të dhënave dhe ushtron kompetencat e parashikuara nga ligji, me qëllim zgjidhjen e ankesës, në kuadër të garantimit të të drejtave të tyre dhe përpunimit të ligjshëm të të dhënave personale, në përputhje me Ligjin nr. 124/2024 dhe me Kodin e Procedurave Administrative.

1. Paraqitja e ankesës

Subjekti i të dhënave ka të drejtë të paraqesë ankesë pranë Komisionerit kur vlerëson se të drejtat e tij lidhur me mbrojtjen e të dhënave personale janë cenuar. Ankesa mund të paraqitet edhe nëpërmjet një përfaqësuesi ligjor, subjekti, organizate ose shoqate jofitimprurëse të autorizuar, në kushtet e parashikuara nga ligji. Ankesa duhet të përmbajë identifikimin e ankuesit, përshkrimin e shkeljes së pretenduar dhe dokumentacionin mbështetës, kur është i disponueshëm.

2. Shqyrtimi i ankesës

Pas marrjes së ankesës, Komisioneri ia kalon atë strukturës përgjegjëse për mbrojtjen e të dhënave personale, e cila verifikon faktet, bazën ligjore të saj, si dhe shqyrton pretendimet e paraqitura, duke vlerësuar përputhshmërinë e veprimeve të kontrolluesit ose përpunuesit me kërkesat e Ligjit nr. 124/2024.

3. Verifikimi i ankesës dhe hetimi administrativ

Gjatë shqyrtimit të çështjes, Komisioneri mund:

• të kërkojë informacion, dokumentacion dhe shpjegime nga kontrolluesi ose përpunuesi;
• të kryejë hetime administrative ose auditime për mbrojtjen e të dhënave personale;
• të marrë informacion dhe të kryejë verifikime të tjera të nevojshme për zgjidhjen e çështjes.
• të zhvillojë seancë dëgjimore publike me pjesëmarrjen e palëve, kur e çmon të nevojshme.

4. Vendimmarrja dhe masat e Komisionerit

Pas shqyrtimit të ankesës, Komisioneri mund të:

• pranojë ankesën, kur konstaton shkelje të dispozitave të ligjit;
• rrëzojë ankesën, kur nuk konstaton shkelje të legjislacionit për mbrojtjen e të dhënave personale, ose kur objekti i ankesës është jashtë fushës së veprimtarisë së Komisionerit;
• urdhërojë masa korrigjuese për garantimin e respektimit të të drejtave të subjektit të të dhënave;
• vendosë sanksione administrative, në rastet e shkeljeve të parashikuara nga ligji.

KUNDËRVAJTJET DHE SANKSIONET ADMINISTRATIVE

Shkeljet e dispozitave të Ligjit nr. 124/2024 “Për mbrojtjen e të dhënave personale” nga kontrolluesit ose përpunuesit e të dhënave personale dënohen me sanksione administrative të vendosura nga Komisioneri. Komisioneri vendos sanksione administrative në mënyrë efektive, proporcionale dhe me karakter parandalues, duke marrë parasysh rrethanat e çdo rasti konkret. Në përcaktimin e vendosjes dhe masës së sanksionit, ndër të tjera, vlerësohen:

• natyra, rëndësia dhe kohëzgjatja e shkeljes;
• numri i subjekteve të të dhënave të prekura dhe niveli i dëmit të shkaktuar;
• nëse shkelja është kryer me dashje ose nga pakujdesia;
• masat e marra për kufizimin ose korrigjimin e dëmit;
• niveli i përgjegjësisë së kontrolluesit ose përpunuesit dhe masat teknike e organizative të zbatuara;
• shkeljet e mëparshme të ngjashme;
• shkalla e bashkëpunimit me Komisionerin;
• kategoria e të dhënave personale të prekura;
• mënyra e njoftimit të shkeljes dhe çdo rrethanë tjetër rënduese ose lehtësuese, përfshirë përfitimet financiare ose humbjet e shmangura nga shkelja.

Sanksionet administrative mund të shoqërohen ose të zëvendësohen me masa korrigjuese, me qëllim rivendosjen e përputhshmërisë me ligjin dhe garantimin e të drejtave të subjekteve të të dhënave.

Masa e sanksioneve

Në varësi të natyrës dhe rëndësisë së shkeljes, Komisioneri mund të vendosë: Në rast se një kontrollues ose përpunues kryen disa shkelje të lidhura me të njëjtin përpunim, masa totale e sanksionit nuk tejkalon kufirin e parashikuar për shkeljen më të rëndë.

E DREJTA PËR T’IU DREJTUAR GJYKATËS

Subjekti i të dhënave ose çdo person fizik apo juridik që pretendon se i është cenuar një e drejtë apo interes i ligjshëm nga një veprim, mosveprim ose akt i Komisionerit, ka të drejtë t’i drejtohet gjykatës administrative kompetente, sipas legjislacionit në fuqi për gjykimin e mosmarrëveshjeve administrative.

BASHKËPUNIMI ME ZYRËN E KOMISIONERIT

Institucionet publike dhe subjektet private kanë detyrimin të bashkëpunojnë me Zyrën e Komisionerit, duke vënë në dispozicion informacionin dhe dokumentacionin e kërkuar për përmbushjen e detyrave të tij, si dhe duke informuar mbi zbatimin e rekomandimeve të dhëna brenda afateve të përcaktuara.